Сапар Исаков чиновниктерди кызматтык унааларды президенттин жана өкмөттүн иш башкармасына тапшырууга милдеттендирди

Премьер-министр Сапар Исаков "Мамлекеттик мекемелерде жана жергиликтүү өз алдынча башкаруу органдарында кызматтык жана нөөмөттүк автотранспортту азайтуунун эсебинен мамлекеттик бюджеттин каражатын үнөмдөө боюнча чаралар жөнүндө” токтомуна кол койду.

Ага ылайык, мамлекеттик мекемелердин жетекчилери президенттин жана өкмөттүн иш башкармасына жана Мамлекеттик мүлктү башкаруу фондуна автотранспорттор сатып алынуучу эл аралык уюмдар каржылоочу долбоорлордун башталышы жөнүндө маалымат берүүнү камсыздашы керек.

"Эл аралык уюмдар каржылоочу ар түрдүү долбоорлорду ишке ашыруунун алкагында, анын ичинде гранттардын жана каржылоонун башка булактарынын эсебинен алынган же берилген оперативдүү башкарууда же чарбалык карамагында турган, белгиленген лимиттерге кирбеген автотранспорт каражаттарды ал долбоорлор аяктаганда президенттин жана өкмөттүн иш башкармасынын оперативдүү башкаруусуна өткөрүп беришсин", - деп айтылат токтомдо.

Ушул токтом расмий жарыяланган күндөн тартып он беш күн өткөндөн кийин күчүнө кирет.

Автор: Нургазы Аматов