Жээнбеков айдоочулардын жана жөө жүргүнчүлөрдүн жоопкерчилигин жогорулаткан мыйзамга кол койду

Президент Сооронбай Жээнбеков “Кылмыш-жаза кодексине өзгөртүүлөрдү киргизүү жөнүндө” мыйзамга кол койду. Бул тууралуу президенттик аппараттын басма сөз кызматы билдирди.

Маалым болгондой, Мыйзам Жогорку Кеңеш тарабынан 2017-жылдын 21-декабрында кабыл алынган.

Мыйзамдын максаты - жол коопсуздугу эрежелерин түздөн-түз бузган адамдардын гана эмес, жол-транспорттук кырсыгына тиешеси бар башка катышуучулардын – жөө жүргүнчүлөр жана мындай транспорт каражатын эксплуатациялоого жооптуу адамдардын дагы жоопкерчилигин жогорулатуу аркылуу жол-транспорттук кырсыктарды кыскартуу.

Каралган жазалардын санын кыскартуу жана алардын мөөнөтүн жана көлөмүн конкреттештирүү жолу менен күнөөлүү адамды жоопкерчиликке тартууда коррупциялык тобокелдер азайтылат.

Кылмыш-жаза кодексинин 281 (Кыймыл коопсуздугу жана транспорт каражаттарын эксплуатациялоо эрежелерин бузуу), 284 (Мас абалындагы адамга же транспорт каражатын башкарууга укугу жок адамга транспорт каражатын башкарууга жол берүү) жана 285-беренелерине (Транспорттун коопсуз ишин камсыз кылган эрежелерди бузуу) киргизилген өзгөртүүлөр жазаны катаалдаштырат жана конкреттештирет.

Мыйзам расмий жарыяланган күндөн тартып он күн өткөндөн кийин күчүнө кирет.

Автор: Нургазы Аматов