Түштүк Кореянын мурдагы президентинин курбусу 20 жылга эркинен ажыратылды

Түштүк Кореянын мурунку президентинин курбусу Чхве Сун Силь

Түштүк Кореянын мурдагы президенти Пак Кын Хе

Түштүк Кореянын мурдагы президентинин курбусу 20 жылга эркинен ажыратылды. Бул тууралуу чет элдик маалымат каражаттары жазып чыгышты.

Белгилүү болгондой, Сеул шаарынын соту 13-февралда Кореянын мурдагы өлкө башчысы Пак Кын Хенин жакын курбусу Чхве Сун Силди кызматтык абалдан кыянаттык менен пайдаланууга, паракорчулукка айыптап, 20 жылга эркинен ажыратты.

Ошондой эле сот айыпталуучуну 16 миллион доллар айып төлөөгө милдеттендирген. Мамлекеттик айыптоочу соттон Чхве Сунду 25 жылга эркинен ажыратып, 116 миллион доллар айып салууну суранган.

Мындан сырткары сот "Lotte Group" компаниясынын жетекчиси Син Дон Бинди Чхве Сунга пара бергендиги үчүн 2 жыл 5 айга эркинен ажыраткан.

Чхве Сун Силдин аты Түштүк Кореядагы чоң коррупциялык чыр менен байланышкан. Ал өлкө башчысынын атын жамынып көптөгөн ири компаниялардан акча талап кылган. 2016-жылдын ноябрь айында камакка алынып, ага 18 берене боюнча айып коюлган. Сот иштери 1 жылдан ашык убакытка созулган. Бул окуядан көп өтпөй 2017-жылдын март айында өлкө башчысы Пак Кын Хе "коррупциялык иштерге байланышы бар" деген шек менен камакка алынган.

Автор: Айзада Тураркулова