"Экотехинспекция кийинки жумада Бишкек ЖЭБдеги аварияга тиешелүү адамдардын аты-жөнүн жарыялайт" дейт Муратбеков

Экологиялык жана техникалык коопсуздук боюнча мамлекеттик инспекциясы кийинки жумада Бишкек ЖЭБдеги аварияга тиешелүү адамдардын аты-жөнүн жарыялайт. Бул тууралуу бүгүн, 16-февралда инспекциянын төрагасы Канатбек Муратбеков Жогорку Кеңеште ЖЭБдеги авария боюнча түзүлгөн депутаттык комиссиянын суроолоруна жооп берип жатып билдирди.

"Алдын ала жыйынтыктарды буга чейин биз айтып чыкканбыз. Бир-эки күндө аягына чыгабыз. Ишке болгон шалаакылык мамиледен улам ЖЭБде кырдаал жаралган. Кимдер күнөөлүү экени боюнча териштирүү иштери жүрүп жатат. Күнөөлүү адамдардын аты-жөнүн кийинки жуманын башында жарыялайбыз", - деди Муратбеков.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн.

Депутаттык комиссиянын курамына төмөнкүлөр кирет:

"Өнүгүү-Прогресс" фракциясынан Исхак Масалиев,

КСДП фракциясынан Төрөбай Зулпукаров, Данияр Аттокуров, Аида Касымалиева, Улан Примов, Аалы Карашев;

"Бир Бол" фракциясынан Мыктыбек Абдылдаев;

"Ата Мекен" фракциясынан Сайдулла Нышанов;

"Республика-Ата Журт" фракциясынан Айбек Алтынбеков, Акылбек Жамангулов, Умбеталы Кыдыралиев;

"Кыргызстан" фракциясынан Исланбек Сарсейитов, Алмазбек Токторов.

Автор: Мунарбек Жоргомов