"Бутумду торпок тебелеп кийин ал ракка айланып, бутумду кестирдим. Азыр ай сайын 40 миң сомго чукул акчага дары алып жатам" дейт Оштун тургуну

Ош облусунун Кара-Суу районун 28 жаштагы тургуну Гүлзада Сагынбаеваны кош бойлуу кезде бутун торпок тебелеп кеткен. Ал жаракатка көңүл бурбай жүрүп, кийин ракка айланып кеткендигин айтат.

"2010-жылы турмушка чыгып, улуу балам боюмда бар кезде торпок бир бутумду тебелеп кеткен. Бир аз ооруп жүрдү, бирок ага көңүл деле бурган эмесмин. Баламды төрөдүм, бутумдун ооруганы деле билинбей калгандыктан, мен ал окуяны унутуп калгам. Кийин 2011-жылы Орусиянын Москва шаарында иштеп жүргөн күйөөм менен чогуу иштеп келейин деп бардым. Башында жакшы эле иштеп жүрдүм, кийин бутум ооруп, шишип баштады. Ал учурда 2-балам боюмда бар эле, жумуштан чыгып, Кыргыз жергесине кайтып келүүгө аргасыз болдум.

2012-жылы рентгенге тарттырсам, дарыгерлер "бутуңуздун баш бармагынын сөөгү чирип кетиптир, жаракат алдыңыз беле?" деп сурашты. 2 жыл мурун торпок тебелеп кеткенин айтсам, "ошондон улам оору күчөп кеткен, азыр кош бойлуу кезде чоң операция жасаганга болбойт, ириңдеп кетпеши үчүн кичи операция кылып турабыз" дешип, сөөктү тазалашты", - дейт Гүлзада Сагынбаева.

Операция жасалгандан кийин бир нече убакыттан соң дарыгерлер бутунун сөөгү карайып бара жатканын, ага байланыштуу дагы операция жасоо керектигин айтышкан. 2-баласы төрөлөрү менен бир айдан кийин дарыгерлер бутунун баш бармагын кесип салышкан. Бирок ага карабастан буту улам ириңдеп, шишип, дарыгерлер шишикти бир нече жолу кесишкен, бирок кесилгенден кийин да шишик кайра өсүп кете берген.

Ошто дарыгерлерге кайрылып, ооруканаларга жатып дарыланса да баары натыйжасыз болуп, балдак менен басып калган. Шишик бутунун башка бөлүктөрүнө да тарай баштаганда Бишкекке келип анализ тапшырган. Анын жыйынтыгында рак илдети менен ооруп жүргөнү белгилүү болгон. Дарыгерлер химиялык дары-дармектер менен дарыланышы керектигин айтып, Бишкекте бир аз дарыланган соң, борбордо жакындары жоктугуна байланыштуу Ошко кайра кетип калышкан.

"Ошто дары саткан бир фирманын кызматкери жолугуп, ал "ракты айыктырат" деп ишендирип бизге бир топ дарыларын сатып жиберди. Тапкан акчабыздын баарына 4 ай бою ал адамдан дары сатып алып, химиялык дары-дармектерди колдонбой калдым. Бир күнү бутумдан кан ага баштады. Көрсө, мага дары саткан адам "өлгөндүн үстүнө көмгөн" кылып кетиптир. Ал берген дарылар сакайтпай эле ооруну күчөтүп жиберген экен. Бул окуяны дарыгерге барып айтсак "кызыңды өлтүргүң келип жатабы? Бишкекке алып барыңыз тезирээк" деп апамды, ага кошуп мени да жемеледи. Бирок Бишкекке барганга жадакалса жол киреге акча таппай, тааныш дарыгер Оштон эле операция жасоону, бул ооруудан арылуу үчүн бутту кесип салуу керектигин айтты. Жан чыдагыс оору кыйнап андан кутулуу үчүн баарына макул болуп калгам. Бир жумадан кийин бир бутумду жоон сандан кесип салышты", - дейт ал.

Андан сырткары ал ооруканадан чыккандан кийин ай сайын дарылануунун курсунан өтүүсү керектигин, ага бир айда 40 миң сомго чейин акча коротуларын айтат.

Гүлзаданын ден соолугуна кайдыгер карабай, жардам беребиз дегендер үчүн байланыш телефондору: 0773 73 42 41.