Түркиянын Денизли аймагында киши колдуу болуп каза болгон 26 жаштагы кыргыз кызынын өлүмүнө шектелип 30 жаштагы Барыш Үнал аттуу Түрк жараны кармалды. Бул туурасында чет элдик басылмалар жазып чыгышты.
Маалыматка ылайык, каза болгон кыз казинонун ичиндеги барда официант болуп иштеген.
Маркум окуя болгон күнү жумушунан чыгып үйүнө кетип жатканда шектүү ага жеткирүү сунушун айткан. Бирок кыз макул болгон эмес. Мындан улам кызды күч колдонуп унаага салып кеткен.
Шектүү кармалганда ал кызды кийин унаадан түшүрүп койгонун, атайын эмес, кырсык болуп тебелеп алганын айткан. Учурда шектүүнүн иши сотко өтүп камакка алынды. Шектелип кармалган жаран Денизли аймагындагы Каршыяка районунда касапканада иштеген.
Эске салсак, кыздын жансыз денеси 19-мартта эртең менен саат 9:40 чамасында Памуккале районундагы унаа жолунан табылган. Ал 1992-жылы туулган кыргыз кызы Ж.кызы Ы. болгон. Учурда бул боюнча Денизли прокуратурасы кылмыш ишин козгоду. Ал эми Тышкы иштер министрлиги алган маалыматтарга ылайык, учурда кыздын сөөгү Памуккале университетинин ооруканасынын өлүкканасында. Алдын ала маалыматтар боюнча, кызды унаа тебелеп каза болушу мүмкүн. Анын боору жана өпкөсү эзилип кеткен.
Ал эми чет элдик басылмалар маркум кыз муунтуп өлтүрүлүп, андан соң үстүнөн унаа тебелеп кеткенин жазышкан. Окуядан алыс эмес жерден каза болгон кызга таандык паспорт жана уюлдук телефон табылган. Анын жансыз денесин 19-март күнү эртең менен талаадан келе жатышкан адамдар көрүп, полиция кызматына кабарлашкан. Жансыз дене табылган учурда анын белинен ылдый жагында кийими жок экенин айтышкан алар. Укук коргоо органдары отуздай видеокамераларды карап, кишилерди сураган. Окуя камерага түшүп калып, анын негизинде шектүү кармалган.