Премьер-министр Абылгазиев алгачкы жумушчу кеңешме өткөрдү

Премьер-министр Мухаммедкалый Абылгазиев 21-апрелде вице-премьер-министрлердин жана өкмөттүк аппараттын түзүмдүк бөлүктөрүнүн жетекчилеринин катышуусунда алгачкы жумушчу кеңешме өткөрдү. Бул тууралуу өкмөттүн басма сөз кызматы билдирди.

Маалыматка ылайык, премьер-министр өкмөттүк аппарат бийликтин аткаруу бутагынын ишиндеги, атап айтканда, өлкөнүн жалпы социалдык-экономикалык өнүгүүсүндөгү өзгөчө ордун баса белгиледи. Мухаммедкалый Абылгазиев вице-премьер-министрлердин жана өкмөттүк аппараттын түзүмдүк бөлүктөрүнүн жетекчилеринин астында өкмөттүн жаңы курамынын иш принциби жана артыкчылыктуу багыттарын белгиледи.

Премьер-министр өкмөттүк аппарат республиканын мамлекеттик органдарынын ишин координациялоо жана анын натыйжалуулугун жогорулатуудагы ролун күчтөндүрүүнүн маанилүүлүгүн белгиледи.

Мындан тышкары, өкмөттүн чечимдерин жана башка ченемдик-укуктук документтерди даярдоодо анын сапатын жогорулатуу зарылдыгы көрсөтүлдү.

Аны менен катар Мухаммедкалый Абылгазиев өкмөттүн жалпы ишмердүүлүгүндө коомчулуктун пикирин эске алып, ошондой эле президенттик аппарат жана Жогорку Кеңеш менен тыгыз өз аракеттешүүнүн маанилүүлүгүн белгилеп кетти.

Кеңешменин жүрүшүндө премьер-министр өкмөттүк аппараттын тийиштүү түзүмдүк бөлүктөрүнө ыкчам чечимдерди талап кылган бир катар тапшырмаларды берди.

Автор: Жылдыз Джускембаева