Техастын тургуну тамак уурдаганы үчүн 50 жылга эркинен ажыратылды

АКШнын Техас штатынын тургуну 1 миллион долларга тамак уурдаганы үчүн 50 жылга эркинен ажыратылды. Бул тууралуу батыш маалымат булактары жазып чыгышты.

Белгилүү болгондой, Гильберто Эскамильи Техастагы жашы жете электер департаментинин кызматкери болгон. Ал 10 жыл бою жумуш берүүчүнүн атынан мексикалыктардын фахита тамагын дүңүнөн буюртма менен алдыртып жүргөн. Жыйынтыгында анын карызы 1 миллион доллардан ашып кеткен.

Окуянын бети Гильберто Эскамильи ооруканага кеткен күнү ачылган. Анда тамак жеткирүүчү жайдан департаментке чалып, 363 килограмм фахита буюртмасы кабыл алынганын айткан. Департаменттин кызматкери таң калуу менен эч кандай буюртма бербегенин билдирген. Ал эми тамак даярдоочу жайдын ташуучусу 10 жылдан бери аталган департаментке дал ушул тамакты ташып жүргөнүн айткан.

Гильберто Эскамильи сурак учурунда "башынан эле өзүмчүлдүк кылдым. Мен өзүмдү башкара албай калган чекке жетип калгам" деп айткан. Ал бул кылыгынан кийин дароо иштен айдалган жана мамлекеттик кызматта иштегени үчүн 50 жылга эркинен ажыратылган.

Автор: Бактыгүл Момбекова