Бишкек шаарынын Чыңгыз Айтматов жана Москва көчөлөрүнүн кесилишинде жашыруун иштеп жаткан казинонун 18 жаштагы кардары уттурган акчасын кафеде иштеп жүрүп тапканын айтат.
"Бул жерде кумаркана иштээрин деле билген эмесмин. Өтүп бара жатып көрүп калып, футбол көрө турган жай экен деп ойлогом. Кирсем кыздар кантип ойнош керектигин көрсөтүп беришти. Мен бүгүн 3-4 миң сомдой уттуруп жибердим. Ал акчаларды кафеде иштеп жүрүп тапкан болчум", - дейт кумаркананын кардары.
Ал эми экинчи бир кардары жашы 23тө экенин, баш аягы 4 миллион сомдой уттурганын айтып берди.
"Мен башында кокусунан эле келип калдым. Дайыма уттуруп жатып, кайра кайтарып алам деп жүрүп уттура бердим. Ошентип баш-аягы 4 миллион сомдой уттуруп жибердим. Ушул кумар оюндарынын аркасынан азыр жумушсуз, турак жайсыз көчөдө жүрөм. Мурда жакшы эле иштечүм. Кийин жакындарымдан карызга акча ала берип азыр көчөдө эле жүрүп калдым десем болот. Ата-энемдин үйүнөн да акчаларын көргөзбөй алып кетип жүрүп азыр үйгө да бара албай калдым", - дейт экинчи каарман.