Ысык-Көлдө тамак-ашка ууланган чет өлкөлүк спортчулар ооруканада дарыланууда

Ысык-Көл районунда тамак-ашка ууланган чет өлкөлүк спортчулар ооруканада дарыланууда. Бул тууралуу SUPER.KG порталына Ысык-Көл райондук оорулардын алдын алуу жана мамлекеттик санитардык-эпидемиологиялык көзөмөлдөө борборунун башкы дарыгери Малик Мамбетов билдирди.

"Чет өлкөлүк 7 спортчу өзүн жаман сезип, ичи түйүлүп Чолпон-Ата шаардык ооруканасына кайрылган. Аларга биринчи жардам көрсөтүлүп тийиштүү чаралар көрүлгөн. Учурда алардын абалы туруктуу, дене табы 37,5 градус. Ал эми "Авроранын" ууланган кызматкерлеринин да абалы туруктуу. Биз бардык тамак-ашты анализге алдык, жыйынтык 3-5 күндө чыгат. Учурда абал толугу менен көзөмөлгө алынган", - дейт Мамбетов.

Айта кетсек, 7-майга караган түнү Ысык-Көл районундагы Булан-Сөгөтү айылындагы "Аврора" пансионатында 15 адам тамак-ашка ууланган. Алардын жетөө кикбокс боюнча Азия биринчилигине келген спортчулар болгон.

Белгилей кетсек, Чолпон-Ата шаарында 8-майдан 12-майга чейин кикбокс боюнча Азия чемпиондугу өтөт. Анда 20дан ашык мамлекеттен 200гө жакын спортчу күч сынашмакчы.

Автор: Бактыяр Кыдыралиев