Депутаттар өкмөттөн сотко кайрылууда акы төлөө милдетин Салыктык эмес кирешелер кодексинен алып салууну талап кылышты

Бүгүн, 20-июнда Жогорку Кеңештин жыйынында депутаттар өкмөттөн сотко кайрылууда акы төлөө милдетин Салыктык эмес кирешелер кодексинен алып салууну талап кылышты.

"Ата Мекен" фракциясынан депутат Каныбек Иманалиев өкмөттүн бул мыйзам долбоору Конституцияга каршы келе турганын айтты. "Кыргыз жаранынын турмушун начарлата турган мыйзам кабыл алганга акыбыз жок. Мисалы, автоунаа жол кырсыгына учураса, соттон утабы же утпайбы белгисиз. Унаасы чыгымга учурайт, жактоочуга каражат төлөйт. Сотко кайрылууда доонун 10 пайызы төлөнсө, өзүнүн буюмун кайра алыш үчүн 3 жерге акы төлөп калабы? Бул мыйзам долбоору жарандардын үй-бүлөлүк бюджетине зыянын тийгизет", - деди Иманалиев.

Жогорку Кеңештин төрагасы Дастанбек Жумабеков бул мыйзам долбоорун күн тартиптен алып салуу сунушун добушка койду. Жыйынтыгында сунушту депутаттар колдоду. Өкмөт мыйзам долбоорду кайра иштеп келе турган болду.

Автор: Жылдыз Джускембаева