Бүгүн шаардык сот Канат Исаевдин иши боюнча чечим чыгарат

Бүгүн, 21-июнда Бишкек шаардык сотунда депутат Канат Исаевдин соттук иши каралат. Буга чейин 12-июнда өткөн сот отурумунда айыпталуучу акыркы сөзүн айтып, тергөөчү туура эмес тергеген деп нааразычылыгын билдирген. Анда соттун чечими 21-июнда чыгары жарыяланган.

Эске салсак, Бишкек шаарынын Биринчи Май райондук соту ушул жылдын 4-январында Канат Исаевди 2008-2010-жылдар аралыгында Токмок шаарынын мэри кызматын аркалап турганда "пара алууга жол берген жана кызмат абалынан пайдаланган" деп 12 жылга эркинен ажыраткан. Ошондой эле мүлкүн конфискациялоо менен бирге жазасын өтөгөн соң 3 жылга чейин мамлекеттик кызматтарда иштөөгө тыюу салган. Анын жактоочулары соттун чечимине каршы экенин билдирип, шаардык сотко даттанышкан.

Канат Исаевге Башкы прокуратура тарабынан 2017-жылдын 30-сентябрь күнү "кылмышка даярдануу", "массалык баш аламандык" жана "бийликти күчкө салып тартып алуу же бийликти күч менен кармап туруу" беренелери боюнча кылмыш иши козголуп, УКМК тарабынан кармалган.

Автор: Жылдыз Джускембаева