20 жыл мурун алган тушь менен кирпиктерин боёгон аялдын көздөрү көрбөй калды

20 жыл мурун алган тушь менен кирпиктерин боёгон аялдын көздөрү көрбөй калды. Бул тууралуу чет элдик маалымат каражаттары жазып чыгышты.

Белгилүү болгондой, Австралиянын Аделаида шаарында жашаган Ширли Поттер 20 жыл мурун алган тушь менен кирпигин боёгон соң көзүнө инфекция кирип кеткен. Ал кыздары менен кечеге барарда боёнгон.

Маалыматка ылайык, кийинки күнү Поттердин көзү кызарып ооругандыктан, ал өзүнүн офтальмологуна кайрылган. Бирок ал оорунун себебин биле алган эмес. Күн өткан сайын анын көзүнүн көрүүсү начарлай баштаган. Мындан улам ал кайра дарыгерге кайрылган.

"Дарыгер менден дароо эле "сиз эски косметикалык каражаттарды колдонгон эмессизби?" деп сураган. Мен ага 20 жыл мурун алган тушь менен кирпиктеримди боёгонумду айттым", - деп билдирген Поттер.

Дарыгер Поттерге дарылоо курсун жазып берген. Тилекке каршы, бул анын көзүнүн көрүүсүн сактап кала алган эмес. Дарыгердин айтымында, 3 жылдын ичинде Поттердин көздөрү такыр эле көрбөй калат.

Автор: Айзада Тураркулова