Элчи Кылычбек Султан Түштүк Кореянын Кыргыз Республикасындагы жаңы элчиси болуп дайындалган Ха Тэ-йог менен жолугушту

3-июлда Түштүк Кореядагы Кыргыз элчиси Кылычбек Султан Түштүк Кореянын Кыргыз Республикасындагы элчиси болуп 26-июнда дайындалган Ха Тэ-йог менен жолугушту. Бул тууралуу элчиликтин басма сөз кызматы билдирди.

Маалыматка ылайык, Кылычбек Султан Ха Тэ-йогду жооптуу кызматка киришүүсү менен куттуктап, ийгилик каалады.

Жолугушуунун жүрүшүндө эки өлкөнүн элчилери кыргыз-түштүк кореялык кызматташтыктын бардык маселелерин талкуулашты. Мындан тышкары алар эки тараптуу мамилелерди жаңы деңгээлге көтөрүү боюнча пландары жана пикирлери менен алмашты. Ошондой эле эки өлкөнүн ортосунда соода-экономикалык жана маданий-гуманитардык кызматташтыкты кеңейтүү, жогорку деңгээлдеги саясий байланыштарды алга жылдыруу макулдашылды.

Маалымат үчүн: Ха Тэ-йог көп жылдык тажрыйбасы бар дипломат, Түштүк Кореянын Тышкы иштер министрлигинин системинде 1987-жылдан тарта иштейт. Ал Түштүк Корея Республикасынын АКШдагы, Чехиядагы, Германиядагы, Орусиядагы дипломатиялык өкүлчүлүктөрүндө иштеген. Мындан тышкары Ха Тэ-йог Түштүк Кореянын Тышкы иштер министрлигинде, президенттин администрациясында жана Улуттук коопсуздук кеңешинде жооптуу кызматтарды аркалаган. Ал 55 жашта, бир кыз жана бир уулдун атасы.

Автор: Нургазы Аматов
Фото: Кыргыз Республикасынын Кореядагы элчилигинин басма сөз кызматы