Канадалык ырчы Жастин Бибер модель, алып баруучу Хэйли Болдуинге үйлөнөрү айтылууда

Канадалык ырчы Жастин Бибер модель жана алып баруучу Хэйли Болдуинге үйлөнөрү айтылууда. Мындай маалыматты чет элдик басылмалар жазып чыкты.

Белгилүү болгондой, ырчы Багам аралында эс алып жүргөндө сүйүктүүсүнө шакек тагып, анын колун сураган. Хэйли Болдуин макулдугун берген. Ал эми Жастин Бибердин атасы социалдык тармактагы жеке баракчасына уулунун сүрөтүн жүктөп, "Сыймыктануу - бул кичирейтип көрсөтүү. Кийинки бөлүмүн күтөбүз" деп жазса, апасы "сүйүү, сүйүү, сүйүү" деген билдирүү калтырган. Мындан улам жергиликтүү маалымат каражаттары жакында той болорун жазып чыккан. Азырынча түгөйлөр бул боюнча билдирүү тарата элек.

Түгөйлөр 2015-жылы мамиле куруп, бир жылдан кийин эки башка жолго түшкөн. Жастин Бибер менен Хэйли Болдуин ушул жылдын июнь айында кайрадан табышкан.

Эске салсак, Жастин Бибер 2011-2015-жылдар аралыгында ырчы Селена Гомес менен кыз-жигит болуп, эки башка жолго түшүшкөн соң бири-бири тууралуу ар түрдүү терс пикирлерди айтып жүрүшкөн. 2017-жылдын январь айынан тарта Селена Гомес рэпер The Weeknd менен мамиле куруп баштаганын ачыктаган. Алардын мамилеси узакка созулган эмес.