Кытайдын ТВЕА компаниясы куруп жаткан ЖЭБдеги цехтин өз учурунда бүтпөй калышынын себеби айтылды

Бишкек ЖЭБдеги химиялык суу тазалоочу цехтин июль айында бүтпөй калышына өз учурунда курулуш долбоорунун даяр эместиги себеп болгон. Бул тууралуу SUPER.KG'ге 30-июлда "Улуттук энергохолдинг" компаниясынын басма сөз кызматынан кабарлашты. Курулуш долбоорунун даяр эместигинен улам цехти бүткөрүү иши 1-октябрга жылдырылды.

"Апрель айында химиялык цехти 125 күндүн ичинде колдонууга киргизүү иши паландалган. Бирок долбоордун токтому өз маалында чыгарылбай, белгиленген мөөнөт 1-октябрга жылдырылды. Учурда химиялык цех иш жүзүндө даяр болуп калды. Учурда Мамлекеттик курулуш ишканасынын алдында түзүлгөн топ ишти текшерип жатат. 2 жуманын ичинде корутунду чыгарышат. Андан кийин 40 күндүн ичинде тесттик режимде колдонуп, текшерүүдөн өткөрөбүз", - деп билдиришти компаниядан.

Айта кетсек, биринчи вице-премьер-министр Кубатбек Боронов 28-июлда энергетика тармагын күз-кыш мезгилине даярдоонун алкагында Бишкек ЖЭБине барып, аталган цехтин курулушун 2018-жылдын 1-октябрына аяктоону тапшырган.

"Улуттук энергохолдинг" компаниясынан буга чейин кабарлашкандай, цехти Кытайдын ТВЕА компаниясы 5,5 миллион долларга куруп берүүдө. Аталган сумма ЖЭБди жаңылоо боюнча келишимдин ичиндеги каражат.

Айта кетсек, 26-январда Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Мындан улам бир жыл мурун Кытайдан алынган 386 миллион доллар менен жаңыланган ЖЭБге карата сын-пикирлер күчөгөн. Бул факты боюнча кылмыш иштери козголуп, тергөөнүн жүрүшүндө бир топ жооптуу кызматкерлер кармалган.

Автор: Бекболсун Молдояр уулу