Орусияда кыргыз келин 9 ай мурун аты-жөнү өзгөртүлүп балдар үйүнө берилип кеткен кызын кайтарып алды

Орусиянын Москва шаарында кыргыз келин 9 ай мурун аты-жөнү өзгөртүлүп балдар үйүнө берилип кеткен кызын кайтарып алды. Бул тууралуу 2-августта Кыргыз өлкөсүнүн Орусиядагы элчилигинен кабарлашты.

Маалым болгондой, Б.Р. аттуу кыргыз келин 2017-жылдын 19-октябрында Москвадагы төрөт үйлөрдүн биринде кыз төрөгөн. Бирок бир күндөн кийин кыргыз келин кургак учукка каршы Москва шаардык илимий-тажрыйбалык борборго которулуп кетип, кызы шаардагы №6-балдардын инфекциялык клиникасына которулган. Б.Р. ооруканада жатып кызынын жанында боло албагандыктан кызга №6-клиникасы тарабынан "баланы энеси таштап кетти" деген документ даярдалып, башка эле ат менен күбөлүк берилип, балдар үйүнө өткөрүлүп кеткен.

Кыздын апасы ооруканадан чыккан соң элчиликке кайрылып, элчиликтин юристи менен бирге Москва шаарындагы райондук сотко баланы кайтарып алуу боюнча арыз беришкен.

31-июлда райондук сот баланын күбөлүгүнө өзгөртүү киргизип, баланы өз энесине кайтаруу боюнча өтүнүчтү канааттандырды.

Автор: Жамалидин Парманкулов