Элдик видео: Мурдагы вице-премьер-министр Темир Жумакадыровду жубайы ыр саптары менен эскерди

"Медиа-порталдын" "ЭЛДИК ВИДЕО" бөлүмүнө вице-премьер-министр Темир Жумакадыровду жубайы Нора Сүйүналиева эскерген видео жүктөлдү. Видеодо маркумдун жубайы көзүнө мончок жаш алып жолдошун эскерип ыр окуган. Анда "Сүйүктүүңөрдөн ажырабагыла! Бири-бириңерден бир кадам алыста болсоңор дагы түбөлүккө коштошкула!" деген саптар айтылат.

Жол кырсыгынан каза болгон мурдагы вице-премьер-министр Темир Жумакадыров арабызда болгондо бүгүн, 4-августта 39 жашка чыкмак. Ал 2017-жылы 7-октябрда жол кырсыгына кабылып көз жумган. Аны менен кошо жардамчысы Нурлан Жамгырчиев жана айдоочусу алган жаракаттарынан улам каза болгон.

2-февралда Чүй облусунун Москва райондук соту Темир Жумакадыров каза болгон жол кырсыгы боюнча ишти карап, КамАЗдын айдоочусу Автандил Таалайбек уулун 10 жылга жатак абагына кескен. Андан тышкары айдоочу 2 миллион 95 миң 250 сом төлөөсү милдеттендирилген.