Өкмөт башчы жылуулук мезгилине даярдык боюнча иш-чаралар кыска мөөнөттө аякташы керектигин айтты

Кыргыз Республикасынын премьер-министри Мухаммедкалый Абылгазиев Чүй облусу боюнча иш сапарынын алкагында "Чакан ГЭС" гидроэнергетикалык компаниясынын Быстровка ГЭСине барып "Жылуулук мезгилине даярдык боюнча бүтүндөй иш-чаралар комплекси кыска мөөнөттө аяктоого тийиш" деди. Маалыматты өкмөттүн басма сөз кызматы билдирди.

Быстровка ГЭСине барганда премьер-министр энергетикалык тармактын жана "Чакан ГЭС" компаниясынын жетекчилери менен республикада чакан гидроэнергетиканы өнүктүрүү маселелерин талкуулады. Мухаммедкалый Абылгазиев энергетика тармагында белгиленген милдеттерди ишке ашыруунун алкагында жылуулук мезгилине даярдык боюнча бүтүндөй иш-чаралар комплексин кыска мөөнөттө аяктоо зарылдыгын белгиледи.

Белгилүү болгондой "Чакан ГЭСте" электр энергиясын иштеп чыгуунун жылдык өсүшү 10 пайыздан ашат. Ошол эле учурда жылдык экспорт 130 миллион кВт саатты түзөт.

Автор: Айпери Ганыжан кызы