Индонезияда өтүп жаткан Жайкы Азия оюндарында грек-рим күрөшү боюнча Кыргыз балбаны Амантур Исмаилов коло медаль тагынды.
Бүгүн, 21-августта Жакарта шаарында өтүп жаткан Жайкы Азия оюндарында грек-рим күрөшү боюнча 2 салмак ченинде беттештер орун алды. Анда 67 килограммга чейинки салмак ченинде Кыргыз өлкөсүнөн Амантур Исмаилов катышып коло медаль үчүн күрөшүүгө мүмкүнчүлүк алды. 3-орун үчүн беттеште Исмаилов кытайлык Жанг Гакуанга туш келди. Беттештин жыйынтыгында Кыргыз балбаны 6 упай, анын каршылашы 1 упайга ээ болду.
Муну менен кыргыз балбаны Амантур Исмаилов коло медалдын ээси болуп, Кыргыздын капчыгына 6-медалды алып келди. Буга чейин Кыргыз капчыгына күмүш медалдарды Магомед Мусаев, Айсулуу Тыныбекова жана Каныбек Жолчубеков алып келсе, коло медалдарды Айпери Медет кызы жана Мээрим Жуманазарова алып келген.