ИИМ: "Жумуш убактысында унаа ичинде уктап калган инспекторлорго сөгүш берилди"

Буга чейин интернет колдонуучусу Мурза Суранов өзүнүн баракчасына жол боюнда унаанын ичинде уктап жаткан Жол кыймылынын коопсуздугун камсыздоо башкармалыгынын инспекторлорунун видеосун жарыялаган.

Анын жазганына ылайык, видео 29-августта Бишкек шаарындагы Бөкөнбаев жана Чыңгыз Айтматов кең көчөсүнүн кесилишинде саат 17:25те тартылган.

Ички иштер министрлигинин басма сөз кызматы билдиргендей, Форд үлгүсүндөгү В 4985 AL номерлүү унаанын ичинде милициянын прапорщиги Б.К. жана милициянын старшинасы Т.М. жумуш учурунда уктап калышкан.

"Аталган кызматкерлер 29-август күнү Чыңгыз Айтматов жана Бөкөнбаев көчөлөрүнө кызмат өтөөгө барышкан. Буга чейин алар суткасына 16-18 саат кызмат өтөгөнүнө байланыштуу прапорщик Б.К. өзүн жаман сезип, чарчап уктап калган. Ал эми кызмат өтөп жаткан старшина Т.М. дагы уктап калган", - деп билдирди маалымат кызматы.

Жүргүзүлгөн кызматтык иликтөөдөн кийин жумуш убактысындагы тартипти бузгандыгы үчүн жогоруда аты аталган кызматкерлерге сөгүш жарыяланган.