Депутат Таабалды Тиллаев: "Биздикилер оозун ачып отурат. "Кумтөр" менен ЕАЭБдеги өкүлдөрүбүздөн отчёт алышыбыз керек"

"Биздин ЕАЭБдеги өкүлдөрүбүз оозун ачып отурат" деди депутат Таабалды Тиллаев парламенттик комитеттин жыйынында.

Ал аталган өкүлдөрүбүз ишеничти актабай жатканын кошумчалады.

"Кыргыз өлкөсүнүн ЕАЭБде 2 өкүлү бар. Алар эмне кылып жатат? Казакстан бизге бааларды теңдөө боюнча сунуш коюп жатыптыр. Армения аталган биримдикке жакшы шарттар менен кириптир. "Кумтөрдөгү" 3 өкүлдү жана ЕАЭБдеги 2 өкүлдү чакырып, эмне кылып жатканы боюнча отчёт алышыбыз керек", - деди эл өкүлү.

Жыйынтыгында Тиллаевдин сунушу кабыл алынды.

Маалыматка караганда, "Кумтөр" кенинен өлкө бюджетине түшкөн каражаттын көлөмү азайган. Муну өндүрүштүн кыскарганы менен байланыштырышууда.

Учурда парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитети 2017-жылдын бюджетинин аткарылышын талкуулоодо.

Автор: Бектур Токтоноев