Эмгек жана социалдык өнүктүрүү министринин орун басары пенсионерлердин пенсиясы жыл сайын саякаттап келүүгө жетет деп ойлойт (толукталды)

"Мен жыл сайын чет өлкөгө саякаттаган пенсионерлерди билем" деп интернеттеги баракчасына эмгек жана социалдык өнүктүрүү министринин орун басары Лунара Мамытова жазган. Анын бул пикири социалдык тармактарда кызуу талкууга алынууда.

Мамытова интернет баракчасына пикири сындала баштагандан кийин жазган постунун бир сүйлөмүнө оңдоо киргизди.

Оңдоого чейин: "Андай болбосо пенсионерлер пенсиясынан 6-7 миң чогулткандай топтоп, туристтик компаниянын бирине барып кыялыңдагы бир мамлекетке бар".

Оңдоодон кийин: "Андай болбосо кээ бир иштеп жаткан пенсионерлер пенсиясынан чогулткандай топтоп, туристтик компаниянын бирине барып, кыялыңдагы бир мамлекетке чыгып кел".

Мамытованын өзүнө байланышканыбызда посттун сүйлөмүнө өзгөртүү киргизгенин ырастады. "Пикиримди туура эмес түшүнүп алышкан экен. Ошон үчүн текстке өзгөртүү киргизип, оюмду толуктадым. Мен болгону пенсионерлерди башкаларга стимул болсун деп жазган элем. Себеби аэропортто таанышып калган пенсионер эне мугалим болуп иштесе да акчасын чогултуп, чет өлкөгө чыгып турат экен. Анын өзүнө окшош курбулары көп экенин айтып берген. Жумурткадан кыр издегенибиз туура эмес. Мен миң сомдун тегерегинде пенсия алгандар бар экенин жакшы билем", - деди Мамытова.

Лунара Мамытованын постунун толук тексти төмөндөгүдөй:

"Франция, Германия, Бельгия, Америка, Түркия, Египет жана башка өлкөлөргө министрликке келгенге чейин эле өз каражатым менен барып келгем. Менин девизим - дүйнө кыдыруу. Дүйнө кыдыргыла! Ошондо ички дүйнөң кеңейет, акылыңа акыл кошулат. Каткан акчаңды чыгар. Ооба, баягы кара күнгө деген акчаңды чыгар. Андай болбосо кээ бир иштеп жаткан пенсионерлер пенсиясынан чогулткандай топтоп, туристтик компаниянын бирине барып, кыялыңдагы бир мамлекетке чыгып кел. Мен ошондой пенсионерлерди билем, жыл сайын саякатташат.

Иштеп жана пенсия алып жаткандар бар. Кеп ошолор тууралуу болуп жатат. Өзү пенсионер жана анан дагы мугалим болуп иштеген эжелер менен сүйлөшүп калгам. Ошол эжелер жыл сайын сыртка чыгабыз дешти. "Пенсиябызды чогултабыз, "Горящие путёвкаларды" күтүп, арзандатуу менен жыл сайын түрдүү мамлекеттерди көрөбүз" деди. Менин айтканыма булар мисал катары алынды. Кеп бардык пенсионерлер жөнүндө болгон жок", - деп жазган Мамытова.

Мамытованын бул посту интернетте кызуу талкууга алынып жатат. Көпчүлүк жарандар "аталган министрликтин жана анын жетекчилигинин элдин чыныгы турмушунан кабары жок" деп сын тагышууда. Айрымдар "министрдин орун басары пикирин туура эмес түшүндүрүп алды окшойт" дешсе, башка интернет колдонуучулары пенсиянын көлөмү бир айлык турмуш-тиричиликке да жетпей турганын билдиришип, "бул ой аткаминердин өз тармагын түшүнбөй тургандыгынын белгиси" деп жазышууда.