Бишкекте таштандыларды туш келди жерге ыргыткандарга жана аны тыюу салынган жерде өрттөгөндөргө каршы рейд башталды

Бишкек шаардык мэриясы таштандыларды туура эмес төккөндөргө жана өрттөгөндөргө каршы рейд баштады. Бул тууралуу ишкананын маалымат кызматы кабарлады.

Маалыматка ылайык, текшерүүнү шаардык санитардык-экологиялык инспекциясы 1-октябрдан бери жүргүзүп, ушул күнгө чейин 55 объекти боюнча 16 эскертүү берилди.

"Эгерде жарандар таштандыны туш келди жерге ыргытса 1000 сом айып салынат. Ал эми кызмат адамдары ыргытса 5 миң сомго чейин айып төлөйт же 6 саатка коомдук жумуштарга тартылат. Таштандыларды өрттөгөндөр үчүн катардагы жарандар 2 миң сом айып төлөйт же 8 саатка коомдук жумушка тартылат. Ал эми кызмат адамдары 10 миң сом айып төлөйт же 8 саатка коомдук жумушка тартылат", - деп билдирди мэриянын маалымат кызматы.

Шаар бийлиги жашоочуларды таштандыларды атайын жайларга ыргытууну жана таштандыларды, чогулган жалбырактарды тыюу салынган жерлерде өрттөбөөгө чакырат.

Автор: Айзада Тураркулова