Каржы полициясы атайын эсепке дагы 8 миллион сомдон ашык акча которду

Экономикалык кылмыштарга каршы күрөшүү боюнча мамлекеттик кызматы (Каржы полициясы) коррупциялык иштерден өндүрүлгөн каражаттар үчүн ачылган эсепке акча которду. Бул тууралуу 15-октябрда SUPER.KGʹге аталган мекеменин басма сөз катчысы Анастасия Пискур кабарлады.

Анын айтымында, аталган кызмат тарабынан бул жолу атайын эсепке 8 миллион 859 миң 554 сом сом өлчөмүндөгү акча каражат которулган.

"Бул акчалар экономикалык кылмыш боюнча козголгон иштерден улам мамлекетке келтирилген зыяндын ордун толтуруудан чогулду. Мындан ары Коопсуздук кеңешинин 2018-жылдын 8-февралындагы чечимин ишке ашырууга жана экономикалык, кызматтык кылмыштардан мамлекетке келтирилген зыяндын ордун толтурууга багытталган иш-чаралар улантыла берет," - деди басма сөз катчы.

Ошондой эле аталган мекеменин атайын эсепке которгон акча каражатынын жалпы суммасы 185 миллион 458 288 сомду түзгөндүгүн кошумчалады.

Автор: Сталбек Абдижалил уулу