Казакстан Кыргыз өлкөсүнө карата эт азыктарына киргизген чектөөсүн алды

Казакстандын Айыл чарба министрлиги Кыргыз өлкөсүнөн чыгарылган эт азыктарына карата убактылуу киргизген чектөөсүн алды. Бул тууралуу бүгүн, 19-октябрда Кыргыз Республикасынын Ветеринардык жана фитосанитардык коопсуздук боюнча инспекциясынын маалымат катчысы Рахат Садырбекова SUPER.KG'ге маалымдады.

Маалыматка ылайык, Казак тарап Кыргыз өлкөсүндө эпизоотикалык абал туруксуз деген шек менен өлкөдө өндүрүлгөн 5 ишкананын азыктарына чектөө киргизген.

"Биздин өлкөдө мындай маалымат чыккан эмес, чындыгында жаныбарлар арасында оору жайылып жатат деген шектенүүгө негиз жок болчу. Буга карабай Казакстан 12-октябрда эт азыктарына убактылуу чектөө киргизген эле. Биз өлкөдө эпизоотикалык абал туруктуу экенин далилдеген документтерди жөнөткөндөн кийин кечээ, 18-октябрда алар чектөөнү алышты", - деди Садырбекова.

Ал белгилегендей, Казак тарап "Риха" ЖЧКсы, "Кант нан заводу", "Баркад" ЖЧКсы, "Салих" ЖЧКсы, "Адал-Азык" ЖЧКсына чектөө киргизген.

Айта кетсек, буга чейин Кыргыз өлкөсү "Алматы облусундагы канаттуулар фабрикасында куш тумоосу жайыла баштады" деген шек саноодон улам 8-октябрда Казакстандан тоок эттерин ташууга чектөө киргизген. Казак тарап аталган аймакта абал туруктуу экенин далилдегенден кийин Кыргыз тарап убактылуу киргизген чектөөнү алган.

Автор: Кызжибек Раимова