Бишкекте үч күнгө созулган Бүткүл дүйнөлүк тоо форуму жыйынтыкталды

Бишкек шаарында 23-октябрда башталган Бүткүл дүйнөлүк тоо форуму жыйынтыкталды. Форум үч күнгө созулуп, ага 30дай өлкөдөн 300дөн ашык эксперт катышты. Алар климаттын өзгөрүүсү, тоолуу аймактарды өнүктүрүү, ага инвестиция тартуу жана жаңы жаралган маселелер менен сунуштарды талкуулашты.

Айлана-чөйрөнү коргоо жана токой чарбасы агенттигинен кабарлашкандай, форумдун алкагында жаштардын форуму жана тоо көйгөйлөрү чагылдырылган сүрөт көргөзмө да уюштурулду.

Агенттиктин басма сөз кызматынын жетекчиси Бактыбек Рысалиевдин айтымында, эксперттер форумдун жыйынтыгында жыйынтыктоочу документ кабыл алып, кийинки форумду Непал өлкөсүндө өткөрүү чечимине келишти.

"Айтылган сунуш-пикирлерди эске алуу менен жыйынтыктоочу документ кабыл алынды. Ал документти биз форумга катышкан өлкөлөргө жиберебиз. Документте тоолорду, мөңгүлөрдү, экологиялык системди, жаныбарлар менен өсүмдүктөрдү сактоо, анын чечүү жолдору камтылган", - деди

Форум 2012-жылы Швейцарияда, 2014-жылы Перуда, 2016-жылы Угандада өткөн. Кийинки форум 2020-жылы Непал өлкөсүндө өтмөкчү.

Автор: Жамалидин Парманкулов