Кар көчкү, бороондон кийинки Төө-Ашуудагы кырдаал. ӨКМ тамактануучу жана жылынуучу жай уюштурду

Өлкө аймагында туруксуз аба ырайы сакталууда. Буга байланыштуу Өзгөчө кырдаалдар министрлиги билдирүү тараткан. Анда көпчүлүк аймактарда жамгыр аралаш кар жаашы айтылган. Тоолуу райондордогу унаа жолдорунда абал өзгөчө кооптуу болгондуктан Бишкек-Ош унаа жолу менен алыскы сапарга чыгуудан баш тартуу эскертилген. Маалыматка караганда, 24-ноябрда аталган жолдо катуу шамал жүрүп, кар көчкү түшкөн. Ашуулардагы абал тууралуу ӨКМнын басма сөз кызматы төмөнкүлөрдү билдирди.

15:40. Бишкек-Ош унаа жолунун 127-чакырымында көлөмү 1000 куб метр кар көчкү түшүп, унаа жол бир тараптуу жабылган. Жабыркагандар жок. Унаа жолду тазалоого 1 грейдер жана 2 жүктөгүч тартылган.

18:00. Төө-Ашууда жана Ала-Бел ашуусунда кар калың жаап, бороон болууда. ӨКМнын Чүй облустук башкармалыгынын ыкчам тобу кооптуу кырдаал жаралган жерге кетишти.

22:30. Бишкек-Ош унаа жолунун 127-чакырымына түшкөн кар күрткүсү толук тазаланып, унаалар жүрүүдө.

23:30. ӨКМнын Чүй облустук башкармалыгынын ыкчам тобу тарабынан “Сосновка” постунда жана Бишкек-Ош унаа жолунда Көлбаев атындагы тоннелдин аймагында жылынуучу жайлар жана тамак-аш менен камсыздоо уюштурулган. Андан сырткары Токтогул районунун “Арал” постунда жана Ала-Бел ашуусуда абалды тактоо максатында ӨКМнын Токтогул районунун бөлүмүнөн ыкчам топ саат 22:56да чыгып кетти. Бишкек-Ош унаа жолундагы абал көзөмөлдөнүп жатат. Кошумча маалымат берилет.

Автор: Айпери Ганыжан кызы