Белгилүү "Губка Боб" мультфильминин жаратуучусу Стивен Хилленберг каза болду

Балдар сүйүп көргөн "Губка Боб" мультфильминин автору Стивен Хилленберг каза болду. Чет элдик басылмалардын маалыматына ылайык, америкалык аниматор 57 жашында дүйнө салды.

Маалым болгондой, Стивен Хилленберг амитрофтук склероз менен (борбордук нерв системдеринин оорусуна алып келип, паралич жана органдардын кичирейишине алып келген оору) 2017-жылдан бери жабыркап келген.

Америкалык "Nickelodeon" телеканалынын кызматкерлери маркумдун жакындарына көңүл айтты. "Стивен Хилленберг өзүнүн мультисериалында достуктун кандай болорун юмор аркылуу бере алды. Муну менен ал дүйнөдөгү бардык курактагы адамдарга кубаныч тартуулады", - деген телеканалдын жалпы жааматы.

Стивен Хилленберг карьерасын 1987-жылы баштаган. 1993-1996-жылдар аралыгында "Nickelodeon" телеканалында режиссёр, сценарист болуп эмгектенген. Ал эми "Губка Боб" мультфильминин алгачкы сериясы 1999-жылдын 1-майында эфирге чыккан. Учурда мультфильм 60 тилге которулуп, 250дөй сериясы бар.

Автор: Бактыгүл Момбекова