Шенген визасын алуу жөнөкөйлөштүрүлөт. Анткени Евробиримдик 2019-жылы виза кодексин кайра карап чыгат. Бул тууралуу ЕБдин Борбор Азия өлкөлөрү боюнча атайын өкүлү Петер Буриан Бишкекте журналисттер менен жолугушууда билдирди.Анын айтымында, Европа биримдиги Европада саякаттоону каалаган Кыргыз өлкөсүндөгү туристтер үчүн виза алуу шарттарын жеңилдетүүнү карап жатат.
“Евробиримдик жаңы Виза кодексин даярдоодо, бул айрым бюрократиялык процесстерди жоюуга жардам берет”, - деди Буриан.
Ошол эле учурда Буриан мыйзамсыз миграциянын алдын алуу үчүн виза режими керек экенин белгиледи.
"Евробиримдик мигранттарга муктаж. Демографияга караганда, биздин калк карып баратат. Андыктан биз жакшы даярдыктан өткөн жаштарга муктажбыз. Бирок билимдүү кадрлардын баары Европага келип, Кыргыз мамлекетин алсыратуусун каалабайбыз", - деди элчи.
Кыргыз мамлекетинин жарандары Европа биримдигине кирген 28 жана ага кошулбаган бир нече Европа өлкөлөрүнүн аймагына кирүү үчүн милдеттүү түрдө виза алышы керек.
