2019-жылы Соцфондго канча миллиард сом түшөрү белгилүү болду

Бүгүн, 3-декабрда Жогорку Кеӊештин бюджет жана финансы боюнча комитетинин жыйынында “Кыргыз Республикасынын Социалдык фондунун 2018-жылга бюджети жана 2019-2020-жылдарга болжолу жөнүндө” мыйзам долбоору каралды.

Социалдык фонддун төрагасы Медер Ирсалиевдин айтымында, 2019-жылга аталган фонддун бюджетинин долбоору кирешелер боюнча 54 миллиард 61 миллион 345 миң сом эсептелди. Ал эми 2020-2021-жылдарга 57 миллиард 426 миллион 512 миң сом жана 60 миллиард 992 миллион 94 миң сом көлөмүндө түзүлдү.

“2019-жылы камсыздандыруу төгүмдөрүнүн түшүшү эмгек акы төлөө фондунан 27,25 пайыз камсыздандыруу төгүмдөрүнүн ченинен улам аныкталды. Алардын 23 пайызы пенсиялык фондго, 2 пайызы мамлекеттик пенсиялык топтоо фондуна, 2 пайызы милдеттүү медициналык камсыздандыруу фондуна, 0,25 пайызы эмгекчилердин ден соолугун чыңдоо фондуна чегерилет”, - деди ал.

Ошондой эле 2019-жылы камсыздандыруу төгүмдөрүнүн түшүшү 32 миллиард 744 миллион 294 миң сом өлчөмүндө пландалганы белгилүү болду.

Жогорку Кеңештин депутаттары аталган мыйзам долбоорун үч окууда жактырды.

Автор: Наргиза Өмүрбек кызы