Бишкекте 7 ымыркайдын сатылышы боюнча камакка алынган медицина кызматкерлеринин соту 1-февралда болот

Бишкекте 7 ымыркай сатканы аныкталып, камакка алынган медицина кызматкерлеринин кылмыш иши боюнча 3-соттук отурум дайындалды. Буга чейинки эки сот отурумдары жылдырылган. Бул тууралуу бүгүн, 23-январда SUPER.KG порталына Жогорку Соттон билдиришти.

Маалыматка ылайык, 1-февралда бул кылмыш иши боюнча үчүнчү соттук отурум өтмөкчү.

"Кылмыш иши тергелип бүтүп, 2018-жылдын 3-декабрында сотко өткөрүлгөн. Биринчи соттук отурум 27-декабрга дайындалган. Бирок ишти карай турган судья ооруп калгандыгына байланыштуу башка күнгө жылдырылган. Экинчи соттук отурум 18-январга дайындалып, анда жактоочу келбей калганына байланыштуу кийинки сот отуруму 1-февралга жылдырылды. Тергөө амалдарынын жүрүшүндө кылмышка шектелип кармалган кызматкерлер 7 ымыркайды сатканы аныкталган. Учурда бул иш боюнча 7 адам айыпталууда", - деп билдирди Жогорку Соттун басма сөз катчысы Сюита Соурбаева.

Белгилүү болгондой, буга чейин кылмышка шектелген Э.Чудубаева аттуу гинеколог ден соолугуна байланыштуу үй камагына чыгарылган.

Окуянын чоо-жайына кайрылсак:

Милиция кызматкерлери тарабынан 2018-жылдын 7-сентябрында бала сатууга шектелип Бишкектеги үй-бүлөлүк дарыгерлер борборунун гинекологдору кармалган. Бала сатууга шектелип кармалгандар - №1-үй-бүлөлүк дарыгерлер борборунун 1 гинекологу, №18-үй-бүлөлүк дарыгерлер борборунун 2 гинекологу, дагы экөө Бишкектеги төрөт үйлөрдүн биринин кызматкерлери экени айтылган.

Буга чейин бала сатууга шектелип кармалган медицина кызматкерлерине "адам сатуу", "жасалма документ жасоо", "мыйзамсыз аборт жасоо" беренелери менен кылмыш иштери козголгон.

Автор: Мальвина Уметбекова