Орусиянын кээ бир аймактарына кара түстөгү кар жаады

Орусиянын кээ бир аймактарына кара түстөгү кар жаады. Бул тууралуу орусиялык маалымат булактары жазып чыгышты.

Маалыматка ылайык, мындай өзгөчө түстөгү кар Кемерово облусунун бир нече аймактарында жааган. Буга облустагы көмүр иштетүүчү ишканалар себеп болушу мүмкүн экендиги айтылууда. Анткени бир нече күн мурда ири өлчөмдөгү көмүр калдыктары төгүлгөн.

Кемеровонун губернаторунун орун басары маалымат жыйынында кара түстөгү кардын жаашына байланыштуу жергиликтүү прокуратура текшерүү иштерин жүргүзүп баштаганын белгилеп, бирок мындай аба ырайына бир гана көмүр ишканалары себеп болбошу мүмкүн экенин билдирген.

"Тилекке каршы, акыркы учурларда облустагы экология бузулуп кетти. Мунун жыйынтыгын өзүбүз көрүп турабыз. Бирок бир гана көмүр иштетүүчү ишканаларды күнөөлөгөн туура эмес. Транспорт каражаттары, көмүр менен жылытылган жеке ишканалар да абанын булганышына себеп болушу толук ыктымал", - деп билдирген губернатордун орун басары.