Бүгүн, 9-майда кереметтүү Ысык-Көлдүн жээгинде жайгашкан ат майданында Жеңиш майрамына карата көк бөрү боюнча республикалык турнирдин финалдык оюндары өтүүдө.
Азыркы тапта Биринчи Лиганын 1-оруну үчүн "Көл-Төр" - "Кара-Буура" командаларынын беттеши башталды.
10:15. Алып баруучу командалар менен тааныштырып бүткүчө эле оюндун алгачкы мүнөттөрүндө "Көл-Төр" атаандашынын тайказанына улак таштады. Улакты 8-номердеги оюнчу Жаныш Конушбаев салды. Конушбаевдин минген аты - Золотой.
10:20. "Кара-Буура" жерде жаткан улакты илип кетти, бирок "Көл-Төрдүн" оюнчулары улакты жөн эле берип койгон жок.
10:21. Оюн Чолпон-Ата шаарында өтүп жатканына карабастан көрүүчүлөрдүн саны арбын. Көрүүчүлөрдүн көп бөлүгү борбор калаадан барганы айтылууда.
10:22. Курч оюн орун алып "Көл-Төр" командасынын оюнчулары тай казанга жакындап келген атаандаштарын оюн талаасынан сүрүп чыкты. Кайрадан жекеме жеке чыгуу.
10:23. Тайсон аттуу аргымакты минип жүргөн Орозбек Эркинбеков улакты эңип, чабуулга өттү.
10:25. "Кара-Буура" командасы тай казанга карай умтулуп, өздөрүнүн мыкты даярдыктарын көрсөтүшүүдө.
10:26. Демөөрчүлөр да бул оюндун жеңүүчүлөрүнө өзүнчө акчалай сыйлык коюп жатканын алып баруучу айтып жатат.
10:30. Биринчи бөлүк аяктады.
10:40. Командалар келип, ышкырык жаңырып оюн башталды.
10:42. Оюнчулар бири-бирин ат менен катуу күч менен жөөлөшүп жатканына байланыштуу капталда турган калыстар оюнчуларды акырын ойноого чакырышты.
10:43. Кайрадан жекеме жеке Миллион менен Золотой ортодо.
10:45. "Көл-Төр" командасынын катардагы чабуулу. Улак тай казанда. Эсеп 2:0.
10:47. Айта кетчү нерсе, "Көл-Төр" - Ысык-Көл облусунун командасы болсо, "Кара-Буура" командасы Талас облусунан келген.
10:49. "Көл-Төр" командасынын оюнчусу Жаныш Конушбаев Золотой аттуу аргымагы менен активдүүлүгүн көрсөтүүдө.
10:50. "Кара-Буура" атаандашынын тай казанынын айланасында оюн жүргүзүп, бирок "Көл-Төрдүн" коргоочулары улакты тай казанга салуусуна мүмкүнчүлүк берген жок.
10:52. Данияр Искендеров улакты такымга басып чабуулга өттү. Улак тай казанда эсеп 2:1. "Кара-Буура" командасы эсеп санын ачты.
10:53. Улак ортодо. Көрүүчүлөрдүн ичинен командаларга кызыктыруучу сыйлык коюп жаткан демөөрчүлөр улам келип жатканын алып баруучу айтууда.
10:55. "Көл-Төр" командасынын капитаны Нурбек Жакыпбеков улакты жула качып, тай казанды көздөй умтулду. Бирок коргоочулар мүмкүнчүлүк бербей оюн талаасынан чыгып кетти.
11:00. Экинчи тайм соңуна чыкты.
11:10. Калыстын ышкырыгы жаңырып, оюндун акыркы бөлүгү башталды.
11:12. Акыркы мүмкүнчүлүк экенин туйган командалар дароо эле улакты талашканга өтүп, бири-биринен кем калышпай оюн көрсөтүүдө.
11:14. "Көл-Төр" командасынан кайрадан эле Эржан Талантбек уулу өзүнүн Хан-Күрөң аты менен, ал эми "Кара-Буурадан" Кушчубай өзүнүн Хусейин-Көк аты менен жекеме жеке чыгышууда. Бүгүнкү оюнда бул 2 оюнчунун жекеме жеке көп чыгып, мыкты оюн тартуулап жатканына күбө болуудабыз.
11:15. Жаныш Конушбаев өзүнүн Золотой аты менен кайрадан чабуулда.
11:17. Улак Урмат Абдыш уулунда, бирок "Кара-Бууранын" коргоочулары тай казанга жакындаганга мүмкүнчүлүк бербей жатат.
11:19. "Кара-Буура" командасы чабуулга өтүп, бирок алар оюн талаасынан чыгып кетишти.
11:22. Жекеме жеке чыгуу биринчи жуп бөлүнгөн убакытта улакты ала албаганына жараша, жуптар алмаштырылды.
11:24. Оюндун аякташына саналуу гана мүнөттөр калганына байланыштуу "Көл-Төр" командасынын оюнчулары убакытты созуп жатышат.
11:30. Оюн аягына чыгып Ысык-Көлдүн "Көл-Төр" командасы Биринчи Лиганын чемпиону аталды.
