Атамбаевдин жан сакчысынын 20 миллион сомдук делген үйлөрүнүн бири (фото)

Мыйзамсыз баюуга шектелип жаткан УКМКнын 9-кызматынын мурдагы бөлүм башчысы Дамир Мусакеев журналисттерге өзүнө жана туугандарына таандык мүлктөрүн көрсөтүүдө.

Алгач ал Чүй облусунун Биримдик конушундагы үйүн көрсөттү. Турак жайдын курулуш иштери толук аяктабаганы байкалды. Мусакеевдин айтымында, жер тилкени атасы 2006-жылы 25 миң сомго сатып алган. Учурда бул үйдө Мусакеевдин инилери жашап жатканы айтылды. Жер тилкенин жалпы аянты - 6 сотых.

Буга чейин Башкы прокуратура 2010-2017-жылдар аралыгында жалпы суммасы 20 миллион сомду түзгөн мүлктөрдү сатып алганы боюнча маалымат тараткан. Сатып алынган мүлктөр Дамир Мусакеевдин туугандарына (атасы, апасы, аталаш бир тууганына) катталганы да маалымдалган.

Кийин Мусакеев Башкы прокуратура көрсөткөндөй мүлктөрү болсо, 2016-жылга чейин үй-бүлөсү менен УКМКнын бир бөлмөлүү жатаканасында жашабай тургандыгын айтып чыккан.

Автор: Мальвина Уметбекова
Фото: Мальвина Уметбекова