"Ала-Арчага" кирүүгө ар бир унаадан 450 сомдон алынат. Бул акчалар каякка жумшаларын президенттин өкүлү айта алган жок

Жогорку Кеңештин 30-майдагы жыйынында депутат Ирина Карамушкина "Ала-Арча" мамлекеттик жаратылыш паркына кирүүгө ар бир унаадан 450 сомдон алынарын айтты.

Ал президенттин парламенттеги өкүлүнө кайрылып, "Ала-Арча" паркы президенттин иш башкармалыгынын карамагында экенин эскертип, айдоочулардан түшкөн акчалар каякка жумшаларын сурады.

Президенттин өкүлү маалыматты тактаган соң жооп берерин убадалады.

"Ала-Арча" жаратылыш паркы - мамлекет тарабынан коргоого алынган аймак. Ал Ала-Арча капчыгайын ээлейт. Бишкек шаарынан 35 чакырым түштүк тарапта жайгашкан. Аянты - 19,4 миң гектар. Көптөгөн жарандар ал жерде эс алууну жакшы көрүшөт, бирок ал жакка кирүүгө ар бир унаадан алынган 450 сом кымбат деп айтылып келет.

Автор: Нургазы Аматов