"Күйөөм каза болуп калып 3 балам менен көчөдө калдым" деген SUPER.TV`нын каарманын ишкерлер батирге көчүрүштү

Буга чейин SUPER.TV "Күйөөм каза болуп калып 3 балам менен көчөдө калдым" деген Назира Элдияр кызынын тагдырын баяндаган эле.

"Жолдошум каза болуп калгандан көп өтпөй эле жалгыз тирөөчүм апам оорудан улам көз жумду. Алардын кыркылыгын бергенден кийин эле кыздарым менен көчөдө калдык. Батирдин акчасын төлөгөнгө мүмкүнчүлүгүбүз жок болгондуктан шаардын четинен вагонду ижарага алып, ушул жерде күн кечирип келе жатабыз. 3 кызымды жалгыз бакканым үчүн 2 миң 430 сом жөлөк пул алып, аны вагондун ижарасына жумшайм. Тамак-ашты мечитке ооз ачырып келгендерден алып жатабыз", - дейт Элдияр кызы.

Башынан оор тагдырды өткөрүп жаткан Назира Элдияр кызынын жашоосу тууралуу репортаж жарыялангандан 2 күн өткөндөн кийин, каарманыбыз жакшы жаңылыгы менен бөлүштү.

"Менин тагдырым тууралуу баян сиздер тарабынан жарыялангандан кийин мага ишкер байкелер байланышка чыгып, жардам берүүнү сунушташты. Алар "Дордой" базары тараптан батир ижарага алып, балдарым менен чогуу көчүрүп барганы жатышат. Буга чейин айрым оокаттарыбызды жеткиргенче, үйдү көрүп келдим. Бардык шарттары бар экен. Ээн жерде эмес, жакын арада бир топ үй-бүлөлөр жашашат экен. Коңшуларыбыз да бизге каралашып турабыз дешти.

Бизге жардам берип жаткан байкелер 2 айлык ижара акысын төлөп коюшуптур. Үй да салып бергенге аракет кылабыз дешти. Андан сырткары да жардам сунуштап байланышкандар көп болуп жатат. SUPER.TV`га жана жардам колун сунгандардын баарына терең ыраазычылыгымды билдирем", - деди Назира Элдияр кызы.