Депутат: "Орусиянын Биринчи каналында бир эле алып баруучу 20 жылдан бери иштейт, ал эми бизде бат-бат алмаша берет"

Бүгүн, 19-июнда Жогорку Кеңеште КТРКнын 2018-жылдагы иши жөнүндө Байкоочу кеңештин отчёту угулду.

Талкуу учурунда депутат Бакирдин Субанбеков эмне себептен алып баруучулар бат-бат алмашып турарына кызыкты.

"Орусиянын Биринчи каналында Екатерина Андреева деген алып баруучу 15-20 жылдан бери жаңылыктарды алып барат. Ал эми бизде бат-бат эле алмаша берет, бул эмнеден улам болууда", - деди депутат.

Буга КТРКнын жетекчиси Жайнак Үсөн уулу: "Алардын иштөө графиги ошондой, бизде алып баруучулукка үйрөткөн атайын курстар бар, ал жакка атайын мугалимдер чакырылып окутулат. Учурда бул катачылыктардын үстүндө иш алып барып жатабыз", - деп жооп берди.

Ал эми КТРКнын байкоочу кеңешининин төрагасы Жыпар Жекшеев: "Айлык акынын аздыгынан кызматкерлерибиз менчик каналдарга кетип калып жатат", - деп кошумчалады.

Автор: Мальвина Уметбекова