КҮНСОБОЛ: Кыргыз-Тажик чек арасындагы чырдан кийин кол коюлган протокол эмне үчүн ушул убакытка чейин ачыкталбай келет? Депутат Төрөбай Зулпукаров: "Мамлекеттик сыр деген бар..."

13-мартта Көк-Таш – Ак-Сай – Тамдык унаа жолунун курулушуна каршы болгон Тажикстандын жарандары менен Кыргыз жарандарынын ортосунда чыр чыккан. Вице-премьер Жеңиш Разаков менен Тажикстандын премьеринин орун басары Азим Иброхим кырдаалды жөнгө салуу боюнча протоколго кол коюшкан. Саясатчы Камчыбек Ташиев бийлик өкүлдөрү Кыргыз-Тажик чек арасы боюнча түзүлгөн жаңы протоколдун мазмунун элден жашырып жатканын айтып чыккан.

22-июлда Баткен облусунун Ак-Сай айылынын тургундары менен Тажикстандын Ворух анклавынын жашоочуларынын ортосунда чыр кайталанды. Мындан улам эки өлкөнүн президенттери жолугушту. Бирок анын жыйынтыгында кандай чечим кабыл алынганы, ошондой эле ушул күнгө чейин жогорудагы протокол тууралуу да кенен маалымат бериле элек.

SUPER.KG порталы "Кыргыз-Тажик чек арасындагы март айында чыккан жаңжалдан кийин протоколго кол коюлган. Эмне үчүн ушул убакытка чейин ошол протокол ачыкталбай келет?" деген собол салды.

Жогорку Кеңештин депутаты Төрөбай Зулпукаров эл өкүлдөрү эки мамлекеттин ортосундагы өкмөттөр аралык комиссиясы чек араны делимитациялоо жана демаркациялоо маселесин иштеп чыккандан кийин гана ошол материалдарды сураганга укугу бар деген пикирин айтты.

"Биз Жогорку Кеңештин депутаттары эки мамлекеттин ортосундагы өкмөттөр аралык комиссиясы чек араны делимитациялоо жана демаркациялоо маселесин иштеп чыккандан кийин гана ошол материалдарды сураганга укугубуз бар. Бул регламенттин талабы. Ошондуктан биз ачыкталышы керек деп талап коюп, айта албайбыз. Тиешелүү тармактык комитеттерде бул маселе каралган. Жогорку Кеңештин депутаттарында сыр сактоо милдети бар. Мамлекеттик сыр деген бар. Протокол эмнеге ачыкталбай жатканын так билбейм. Эгерде мен материал менен тааныша турган болсом эмнеге ачыкталбай жатканын сурамакмын", - дейт Зулпукаров.

Автор: Жылдыз Джускембаева