"НьюТВ" телеканалынын жетекчиси Нурланбек Шакиев: "Бакиев тууралуу даректүү тасмада эч кандай саясат жок". КҮНСОБОЛ

Курманбек Бакиевдин 70 жаш мааракесине карата "НьюТВ" жана "НурТВ" телеканалдары аны жактаган даректүү тасма көрсөттү. УКМК бул даректүү тасманы көрсөткөн маалымат каражаттарына эскертүү берди. Аталган мекеме белгилегендей, Башкы прокуратура тарабынан мурун козголгон кылмыш иштери боюнча К.Бакиев жана анын туугандары көптөгөн оор жана өзгөчө оор кылмыштарды жасагандыгы, ошондой эле 2010-жылдын 7-апрель окуясы, адам өлтүрүү, коррупция жана рейдерлик басып алуулары үчүн соттолгон. Эки телеканал бул даректүү тасманы көрсөткөн соң коомчулукта кызуу талкуу жүрүүдө.

Мындан улам SUPER.KG порталы "Бакиевди актоо кампаниясы башталдыбы?" деген собол салды.

"НьюТВ" телеканалынын жетекчиси Нурланбек Шакиевдин айтымында, даректүү тасма эч кандай актоо же жактоо кампаниясы эмес.

"Мында эч кандай саясат жок. Даректүү тасмада тек гана Бакиевдин балалык, окуучулук мезгили айтылыптыр. Аны Бакиевдин классташтары даярдашыптыр. Ага биздин каналдын эч катыштыгы жок жана телеканалдын көз карашын билдирбейт. Биздин канал бейтараптуулукту карманып келет", - дейт Шакиев.

Автор: Жылдыз Джускембаева