Сазда суу ичип отурган... Омскто дайынсыз жоголуп кеткен 3 жаштагы бала эки күндөн кийин токойдон аман-эсен табылды

Омскто дайынсыз жоголуп кеткен 3 жаштагы бала эки күндөн кийин токойдон аман-эсен табылды. Бул тууралуу орусиялык маалымат каражаттары жазып чыкты.

Маалыматка ылайык, 3 жаштагы бала 13-август күнү ата-энеси менен бирге токойго жер-жемиш тергенге барып, жоголуп кеткен.

"Баланын ата-энеси аны унаага калтырып коюп, жер-жемиш тергенге кеткен учурда бала унаадан чыгып адашып кеткен. Өз күчү менен уулун таба албай койгон ата-эне тиешелүү кызматтарга жардам сурап кайрылышкан. Баланы издөөгө 600 адам, 80 техника жана 2 жеке учак тартылган. Бала жоголгон жеринен 1 жарым чакырым алыстыктан аман-эсен табылган. Ал ачка болуп жана катуу үшүп калган. Куткаруучулар баланы саздан суу ичип, ыйлап жаткан жеринен табышкан. Учурда ал райондук ооруканада дарылануудан өтүүдө", - деп айтылат маалыматта.

Автор: Мальвина Уметбекова