Исландияда мөңгүнүн "тажиясы" өттү. Ага өкмөт башчы, экс-президенттен өйдө жоон топ саясатчылар да катышты

Исландияда мөңгүнүн "тажиясы" болуп өттү. Ага өкмөт башчы, экс-президенттен өйдө жоон топ саясатчылар да катышты. Бул тууралуу дүйнөлүк ЖМКлар жазып чыгышты.

18-август күнү Исландияда Окйокулль мөңгүсү менен 100дөй адам коштошушту. Алардын арасында Исландиянын өкмөт башчысы Катрин Якобсдоуттир, Ирландиянын экс-президенти Мэри Робинсон баштаган саясатчылар, экологдор, окумуштуулар да болушту. Аталган мөңгү глобалдык жылуулуктун айынан эрип кеткен биринчи чоң мөңгү болуп калды. 1901-жылы анын аянты 15 чарчы чакырымды түзүп турган, азыркы тапта ал көрсөткүч болгону бир чарчы чакырымга жетпеген аянтты түзөт. 2014-жылы Окйокулль кыймылын токтоткону үчүн "өлүү муз" деп табылган. 2018-жылы аталган мөңгү тууралуу даректүү тасма тартылган.

Исландиянын аймагынын 11 пайызын мөңгүлөр ээлейт. Аталган өлкөдө акыркы 20 жыл ичинде өтө тездик менен мөңгүлөр эрип жатканы маалым.

Автор: Бактыгүл Момбекова