Вице-премьер Замирбек Аскаров: "Орусиядан Кыргыз мамлекетине акча которууга киргизилген чектөө боюнча макулдашуулар жүрүп жатат". КҮНСОБОЛ

Быйыл апрель айында Орусиядан Кыргыз мамлекетине акча которууга айына 100 миң рубль көлөмүндөгү чектөө киргизилген. Өткөн аптада Москва шаарында Евразиялык өкмөттөр аралык кеңештин кезектеги жыйыны өтүп, ага премьер-министр Мухаммедкалый Абылгазиев катышты. Анда кыргыз тараптан чектөөнү алып салуу боюнча демилге көтөрүлгөн. Бирок эч кандай чечим кабыл алынбай, бул маселе Евразия өкмөт аралык кеңешинин кийинки жыйынында карала турган болду.

SUPER.KG порталы "Орусия Кыргыз өлкөсүнө акча которууга киргизген 100 миң рубль көлөмүндөгү чектөөнү күчүндө калтырды. Бул ЕАЭБдин экономикалык эмес, саясий максатта түзүлгөнүнүн далилиби?" деген собол салды.

Вице-премьер-министр Замирбек Аскаров бул маселени ЕАЭБдин курамына кирген бардык мамлекеттер караш керек деген пикирде. "Жакында премьер-министрлердин жыйыны өттү. Учурда макулдашуу жүрүп жатат. Бул маселени бир гана Орусия менен Кыргыз мамлекети чече албайт. ЕАЭБдин курамына кирген бардык мамлекеттер караш керек. Алардын макулдашуусу болушу шарт. Былтыр 9 айда Орусиядан Кыргыз мамлекетине 1 миллиард 400 миллион доллар акча которулса, быйыл 1 миллиард 200 миллион доллар каражат которулду. Айырма 200 миллион доллар болуп жатат. Бул албетте, чоң акча каражаты болуп эсептелинет", - дейт вице-премьер-министр.