УКМКнын мурдагы бөлүм башчысы Максат Мамытканов: "Жыл башынан бери коомчулук эки маселени көтөрүп келе жатат" КҮНСОБОЛ

Кечээ, 31-октябрда Жогорку Кеңештин жыйынында “Кыргыз Республикасында уран, торий кендерин издөө, чалгындоо жана иштетүү максатында жер казынасын геологиялык изилдөө менен байланышкан ишке тыюу салуу жөнүндө” мыйзам долбоору кабыл алынды. Мыйзам долбооруна ылайык, мындан ары уран, торий аралашкан кендерди изилдөө, чалгындоо, иштетүүдөн сырткары сырттан алып кирүүгө дагы тыюу салынат. Ошондой эле бул багытта берилген лицензиялар жокко чыгарылат.

SUPER.KG порталы "Коомчулуктун, жарандык коомдун кескин каршылыгынан улам Жогорку Кеңеш уран казууга тыюу салган мыйзам долбоорду кабыл алды. Дагы кайсы маселе боюнча коомчулук бекем позициясын көрсөтүүсү керек? деген собол салды.

УКМКнын мурдагы бөлүм башчысы Максат Мамытканов учурда жаратылышты коргоо жана өтө баалуу жаныбарларды сактоо маселеси боюнча терс пикирлер жаралганын айтат.

“Жылдын башынан бери коомчулук көтөрүп келе жаткан эки маселе болгон, биринчи маселе - бул уран маселеси, экинчиси айып пулдар боюнча. Уран маселеси, айып пул маселелери боюнча коомчулуктун пикирин өкмөт кабыл алгандан кийин электр энергиясынын баасын азайтуу маселеси көтөрүлө баштады.

Жакынкы арадан бери талкууга жапайы жаратылышты коргоо, өтө баалуу жаныбарларды сактоо боюнча мыйзам долбоору түшүп жатат. Себеби Жогорку Кеңеш тыюу салгандын ордуна тескери кылып салды, бул нерсе бүгүнкү күндө коомчулуктун ар түрдүү терс пикирлерин жаратууда", - дейт Мамытканов.

Автор: Мальвина Уметбекова