Чет элдик президенттер Сооронбай Жээнбековду туулган күнү менен куттукташууда

Чет элдик президенттер Сооронбай Жээнбековду туулган күнү менен телеграмма аркылуу куттукташууда. Бул тууралуу президенттик аппараттын басма сөз кызматынан билдирди.

Маалыматка ылайык, бүгүн, 16-ноябрда президент Сооронбай Жээнбеков 61 жашка толду.

Жээнбековду алгачкылардан болуп Орусиянын президенти Владимир Путин куттуктады. Ал Жээнбековго чын ден соолук, бакубатчылык жана мамлекеттик ишмердигинде ийгиликтерди каалады.

Казакстандын президенти Касым-Жомарт Токаев: "Сиздин акылман жетекчилигиңиз астында Кыргыз мамлекетинин туруктуу өнүгүшүн камсыз кылуу жана калктын бакубаттуулугун арттыруу боюнча маанилүү социалдык-экономикалык жетишкендиктерди ийгиликтүү ишке ашып жатат", - дейт.

Өзбекстандын президенти Шавкат Мирзийоев Кыргыз-Өзбек ортосундагы стратегиялык өнөктөштүктү мындан ары өнүктүрүүгө бекем ишенимин билдирип, Жээнбековго бекем ден соолук, үй-бүлөлүк бакубаттык жана мамлекеттик ишмердүүлүгүнө ийгиликтерди каалады.

Тажикстандын президенти Эмомали Рахмон: "Сиздин алдыга койгон максаттарга жетүүгө умтулгандыгыңыз Кыргыз мамлекетинин гүлдөп өнүгүүсүнө мындан ары дагы кызмат кылат деп ишенем", - деди.

Кытайдын төрагасы Си Цзиньпин Жээнбековго чын ден соолук жана бардык ишинде ийгиликтерди каалады.

Беларусь президенти Александр Лукашенко: "Сиздин аракетиңиз, акылман жана салмактуу саясатыңыз аркылуу Кыргыз Республикасы бүгүнкү күндө эл аралык аренада өз позициясын жана кадыр-баркын бекемдеп, динамикалуу түрдө өнүгүп келе жатат", - дейт.

Автор: Жылдыз Джускембаева