Кыргыз өлкөсү - Тажикстан - 1:1. Оюн тең чыгуу менен аяктады (хронология)

Финалдык ышкырык жаңырды. Эсеп - 1:1. 

Оюндун чыңалуусу мына. Талаанын ортосунда футболчулар талашып-тартышууда. Башкы калыс баарын жайгаштырды. 

ЛЮЮЮЮКС! Соккусу дарбазанын үстүңкү мамысына тийип калды. 

Коноктор убакытты чоюу боюнча чемпион команда экендигин далилдешти.

"Ак шумкарды" Люкс эмес, Тамирлан Козубаев сактап кетти! Эми дагы бир гол болсо, мындан да сонун болмок эле. 

ГООООООООЛ! Эсеп теңелди. Бурчтан берилген топту Козубаев дарбазага киргизди!

Тайпада 2-орунду алуу көз кайымдан учуп жатат. Бул оюндан жеңилсек, 3-орун үчүн гана Мьянма менен күрөш жүргүзүп калабыз.  

Абада голдун даамы сезилбейт. Бир гана чыңалуу. 

Абдурахманов Шукуровду алмаштырды. 

Сагынбаев кайрадан! Соккусу дарбазага таамай болбой калды. 

Люкс Кыргыз курама командасын сактаганы чыкты. Майер талаадан кетти. 

Коноктор убакытты чоюуну баштады. Бир четинен туура. Конокто мындай жеңиш таттуу. Жеңиш үчүн бардыгына даяр болуш керек.  

Майер сары айып кагазын алды. Буга чейин Шукуров 1-таймда сары кагаз алган. 

Бернхарддын соккусу дагы дарбазадан өйдө кетти. 

Майердин соккусу! Бурчтан чыгарып берилген топту башы менен сокку узатты. Дагы өйдө кетти!

Сагынбаев! Узатылган соккусу дарбазадан бир аз өйдө кетти. 

Кыргыз футболчулары чабуулдар менен 2-таймды баштады. Бул оюнда упай албасак, тайпадан 2-орунду алуу татаалдашат. 

2-тайм башталды. Биринчи алмаштыруу - Юсуповдун ордуна Жыргалбек уулу талаага чыкты. 

1-тайм аяктады. Эсеп - 0:1. 

Мурзаев! Башы менен узатылган соккусун дарбазачы оңой эле тосуп алды. 

Акыркы 10 мүнөт бою чабуулда үй ээлери. Тажик футболчулары коргонууда гана ойноодо. 

Кичиндин жакынкы бурчка узатылган соккусун дарбазачы тосуп кетти! Кооптуу абал. Үй ээлеринин оюну жүрүшпөй жатат. Мындай оюн менен упай алуу оор болот.

Алыкулов эми гана өзүн көргөздү. Анын соккусун дарбазачы тосуп алды. 

Гол. Тажик футболчусу Эргашев эсепти ачты. 

Кооптуу абал жарала элек. Оюн ортоңку бөлүктө жүрүп жатат. 

Шукуровдун бурчтан чыгарып берген соккусу Рибери менен Роббендин комбинациясына окшошуп кетти. Бирок, топ дарбазадан өйдө кетти.  

Азырынча эки команда талаага көнө албай жатышат. Каталар көп кетүүдө. 

Талаада топко ээлик үчүн күрөш жүрүүдө. Кыргыз футболчулары чабуул уюштурууларын баштады. 

Калыс ышкырыгын жаңыртты. Оюн башталды. 

Эки өлкөнүн гимни жаңырды. 

Командалар оюн алдындагы машыгууга чыгышты. 

Крестинин бул оюнга 5-4-1 тактикасы менен ойнойт же оюн өңүтүнө жараша 3-5-1-1 болуп өзгөрөт. 

Негизги курамда Люкс чыкпайт. Башкы чабуулчулук милдетти Мирлан Мурзаев аркалайт.  

Кыргыз өлкөсүнүн курамы белгилүү болду. 

Бүгүн, 19-ноябрда Катар-2022: Дүйнө чемпиондугунда тандап алуу оюндарынын алкагында, Кыргыз курама командасы Тажикстанды кабыл алат.