Жарандык активист Качкын Булатов: "Саясий туткундардын бардыгы камактан бошотулушу керек". КҮНСОБОЛ

Абактагы саясатчы Садыр Жапаров президенттен ырайым сурап кат жазган. 16-октябрда Жазаларды аткаруу мамлекеттик кызматы жазылган катка тийиштүү документтер керек экенин айтышкан. Анын жактоочусунун айтымында, 17-октябрда катка керектүү документтер тиркелип, тийиштүү жерге жөнөтүлгөн. Жапаровдун президенттен ырайым сурап жөнөтүлгөн каты боюнча ырайым кылуу маселелер боюнча комиссия эч кандай маалымат жок экенин билдирди.

Мындан улам SUPER.KG порталы "Садыр Жапаровдун президенттен ырайым сурап жазганына эмне үчүн бир айдан бери реакция болбой жатат?" деген собол салды.

Жарандык активист Качкын Булатов саясий туткундардын бардыгы камактан бошотулушу керектигин айтты. "Сооронбай Жээнбеков президент болгондон бери аны урматтап келе жатабыз. Бирок эч нерсеге реакция кылбай жатат. Коррупцияга каршы күрөштү Атамбаевдин тегерегинде гана жүргүзүп жатат. Саясий туткундарды бошотушу керек эле да. Өмүрбек Текебаевди, Садыр Жапаровду актоо зарыл. Аларды актабай президент өзүнө душмандарды үйүп жатат. Ал туура эмес саясий багытты тандап алды. Сооронбай Жээнбеков өзүн күчтүү саясатчымын десе саясий туткундардын баарын акташ керек. Былтыр мурдагы элчи Кылычбек Султан Тышкы иштер министрлигинде мындай мыйзам бузуулар болуп жатат деп айткан. Бирок ошол учурда реакция болгон эмес. Мурдагы элчи айткан мыйзам бузуу бүгүнкү күндө далилденип калды. Бийлик Садыр Жапаровду коё бергенден өздөрү коркуп жатышат", - дейт Качкын Булатов.