Кыргыз-Мьянма беттеши боюнча ФИФАнын Дисциплинардык комитетинин чечими чыкты

Бишкекте 10-октябрда өткөн Кыргыз-Мьянма беттеши боюнча ФИФАнын Дисциплинардык комитетинин чечими чыкты. Бул тууралуу Футбол федерациясынан билдирет.

Аталган оюндун 2-таймында күйөрман футбол талаасына чуркап чыгып, оюн бир канча мүнөткө токтотулган.

ФИФА бул чечимди чыгарарда төмөнкү жагдайларга көңүл бурган:

- Оюн комиссары жана коопсуздук офицеринин беттешти уюштуруу боюнча оң комментарийи;

- Кийинки оюндардагы (Кыргыз - Япония, Кыргыз - Тажикстан) коопсуздуктун күчөтүлүшү;

- Футбол федерациясынын уюштуруу комитетинин жана башка түзүмдөрүнүн жогорку профессионалдуулугу;

- Футбол федерациясынын жетекчилигинин бул окуя боюнча жеңил жаза берүү өтүнүчү менен кайрылуусу.

Мындан улам ФИФАнын Дисциплинардык комитети келечекте өз үйүндө футбол беттешин кабыл алууда мындай эреже бузуулар кайталанбасын деп жазуу түрүндө эскертүү берди.

ФИФА бул окуя боюнча Футбол федерациясына акчалай айып, оюндарды күйөрмандарсыз өткөрүү же башка өлкөдө өткөрүү жазасын берип коюшу мүмкүн эле.

Автор: Адилет Керимбек уулу
Фото: Адилет Керимбек уулу