Депутат Руслан Казакбаев жасалма унаа номеринин чуусу боюнча: "Бул Мамлекеттик каттоо кызматындагы баш аламандык". КҮНСОБОЛ

Социалдык тармакта 578 АСD мамлекеттик номер менен жүргөн бир канча унаанын сүрөттөрү жарыяланып, анын айдоочусу Мамлекеттик каттоо кызматынын жетекчиси Алмаз Мамбетов болушу мүмкүн экендиги талкууланган. Мамлекеттик каттоо кызматынан аталган унаада Алмаз Мамбетов эмес экендигин билдиришти. Жыйынтыгында бул унаа номерине издөө жарыяланды.

SUPER.KG порталы "Жасалма паспорт чуусу жасалма унаа номеринин чуусуна өттү. Тийиштүү расмий органдар эмне үчүн мындай көрүнүшкө олуттуу чара көрбөй жатат?" деген собол салды.

Жогорку Кеңештин депутаты Руслан Казакбаев бул Мамлекеттик каттоо кызматындагы баш аламандык деген ойдо.

"Биометрикалык паспорт деп жалпы базага маалыматтарыбызды тапшырганбыз. Базанын коркунучтуу экени белгилүү болуп калды. Ар бир адамдын берген маалыматы купуя болушу керек да. Бул Мамлекеттик каттоо кызматындагы баш аламандык. Мамлекеттин коопсуздугуна чоң залакасын тийгизип жатат. Мамлекеттик каттоо кызматынын жетекчиси жооп бериши керек. Бул ишти УКМК карап, көзөмөлгө алышы шарт", - дейт Руслан Казакбаев.

Автор: Жылдыз Джускембаева