Кой-Таш окуясын иликтеген комиссия: "7-8-августтагы окуя болгонго чейин Атамбаевдин үйүндө күнүнө үч жолу тамактануу, күн сайын акча төлөп берүү уюштурулган"

Бүгүн, 12-декабрда Жогорку Кеңеште Кой-Таш окуясын иликтеген мамлекеттик комиссиянын жыйынтыгы каралып жатат. Баяндаманы комиссиянын мүчөсү, депутат Тынчтык Шайназаров жасап жатат.

Анын айтымында, Кой-Ташта күнүнө үч жолу тамактануу, күн сайын акча төлөп берүү уюштурулган. Ал билдиргендей, тамак-аш менен камсыздоого УКМКнын мурдагы башчысы Абдил Сегизбаев дагы жардам берген. "Маалымат каражаттары 7-8-августтагы окуялар болгонго чейин Атамбаевдин Кой-Таштагы үйүнүн айланасы бекем бетондор менен тосулуп, үйүнүн тегереги тикен зымдар менен курчалганын жазган", - дейт Шайназаров.

29-августта Кой-Таш окуясын иликтөө боюнча мамлекеттик комиссия түзүлгөн. Вице-премьер-министр Жеңиш Разаков комиссиянын төрагасы, Жогорку Кеңештин депутаты Бакытбек Райымкулов комиссиянын төрагасынын орун басары болгон. Ал эми комиссияга Жогорку Кеңештин депутаттары, өкмөт өкүлдөрү, коомдук ишмерлер кирген.

Автор: Жылдыз Джускембаева